اسلام آباد: عالمی مالیاتی فنڈ (آئی ایم ایف) نے کہا ہے کہ پاکستان کے ساتھ مذاکرات میں عملے کی سطح کے معاہدے (ایس ایل اے) تک پہنچنے کے لیے اہم پیش رفت ہوئی ہے اور باقی معاملات طے کرنے کے لیے پالیسی سطح پر بات چیت جاری رکھی جائے گی۔
آئمہ بیگ اور شوہر زین احمد کی علیحدگی کی افواہیں، انسٹاگرام مسئلے کو وجہ قرار دے دیا
آئی ایم ایف مشن چیف ایوا پیٹرو وا نے مذاکرات کے اختتام پر جاری بیان میں بتایا کہ وفد نے 24 ستمبر سے 8 اکتوبر تک کراچی اور اسلام آباد کا دورہ کیا۔ اس دوران 7 ارب ڈالر کے قرض پروگرام کے دوسرے جائزے اور ایک ارب 30 کروڑ ڈالر کے کلائمٹ فنانسنگ کے پہلے جائزے پر پاکستانی حکام سے بات چیت کی گئی۔ بعد ازاں آئی ایم ایف ٹیم واپس واشنگٹن روانہ ہوگئی۔
بیان کے مطابق پاکستان نے قرض پروگرام پر عمل درآمد یقینی بنایا ہے اور کئی پالیسی معاملات پر ٹھوس پیش رفت ہوئی ہے۔ ایوا پیٹرو وا کا کہنا تھا کہ مالی نظم و ضبط کے ساتھ ساتھ سیلاب متاثرین کی بحالی کے اقدامات پر بھی بات چیت کی گئی۔
آئی ایم ایف مشن چیف نے مزید کہا کہ اسٹیٹ بینک نے سخت مانیٹری پالیسی کے ذریعے مہنگائی کو قابو میں رکھا، جب کہ توانائی سیکٹر میں ٹیرف ایڈجسٹمنٹ اور پیداواری لاگت میں کمی کے اقدامات کیے گئے۔ انہوں نے یہ بھی بتایا کہ پاکستان نے موسمیاتی تبدیلیوں کے پروگرام (آر ایس ایف) پر عمل درآمد شروع کردیا ہے۔
واضح رہے کہ وفد نے دورے کے دوران وفاقی وزیر خزانہ محمد اورنگزیب سمیت وزارتِ خزانہ اور دیگر اداروں کے حکام سے ملاقاتیں کی تھیں۔ وزیر خزانہ نے بھی اعتراف کیا تھا کہ مذاکرات درست سمت میں آگے بڑھ رہے ہیں۔