جی ایچ کیو راولپنڈی میں پیپلز لبریشن آرمی (PLA) چین کے 98ویں یومِ تاسیس کی تقریب منعقد ہوئی، جس میں فیلڈ مارشل سید عاصم منیر نے پاک چین دوستی کو ناقابل شکست قرار دیتے ہوئے عسکری اور تزویراتی تعلقات کو وقت کی آزمائشوں پر پورا اترنے والا قرار دیا۔
اے این ایف کا ملک بھر میں منشیات فروشوں کے خلاف کریک ڈاؤن، 12 کروڑ سے زائد مالیت کی منشیات برآمد
تقریب کے مہمانِ خصوصی چین کے سفیر جیانگ زائیڈونگ تھے جبکہ میجر جنرل وانگ ژونگ، چینی سفارتخانے کے حکام اور پاک افواج کے سینئر افسران بھی شریک ہوئے۔
فیلڈ مارشل سید عاصم منیر نے چینی مہمانوں کا پرتپاک خیر مقدم کرتے ہوئے پی ایل اے کو یومِ تاسیس پر مبارکباد پیش کی۔ ان کا کہنا تھا:
"پاکستان اور چین کا تزویراتی اشتراک باہمی اعتماد، غیر متزلزل حمایت اور مشترکہ عزم کی علامت ہے۔ بدلتے علاقائی و عالمی حالات کے باوجود پاک چین دوستی ناقابل شکست رہی ہے۔”
انہوں نے کہا کہ پاک فوج اور پی ایل اے حقیقت میں بھائیوں جیسے رشتے میں بندھے ہیں، اور دونوں افواج کی عسکری شراکت داری علاقائی استحکام میں ہمیشہ اہم کردار ادا کرتی رہے گی۔
دوسری جانب چینی سفیر جیانگ زائیڈونگ نے تقریب کے انعقاد پر آرمی چیف کا شکریہ ادا کرتے ہوئے کہا کہ:
"ہم دہشت گردی کے خلاف جنگ میں پاک افواج کے کردار کو خراج تحسین پیش کرتے ہیں۔ چین، پاکستان کے ساتھ اپنی اسٹریٹجک شراکت داری کو مزید وسعت دینا چاہتا ہے۔”
پی ایل اے کی سالگرہ کے موقع پر دونوں ممالک کے درمیان دوستی، تعاون، اور مشترکہ عزم کا اعادہ کیا گیا، جس سے پاک چین تعلقات کے مزید مستحکم ہونے کی امید ظاہر کی گئی۔
