کراچی: پاکستان شوبز انڈسٹری کی سینئر ٹی وی اداکارہ عائشہ خان 76 برس کی عمر میں انتقال کر گئیں، جس پر شوبز شخصیات نے گہرے دکھ اور افسوس کا اظہار کیا ہے۔ پولیس کے مطابق گزشتہ رات اداکارہ کی لاش ان کے فلیٹ سے مردہ حالت میں برآمد ہوئی، جسے ابتدائی طور پر جناح اسپتال اور بعد ازاں ایدھی سرد خانے سہراب گوٹھ منتقل کیا گیا۔ موت کی وجہ تاحال معلوم نہیں ہو سکی، کیونکہ پولیس اداکارہ کے بیٹے کے آنے کا انتظار کر رہی ہے، جس کے بعد پوسٹ مارٹم کا عمل شروع ہوگا۔
اسرائیل عالمی امن کے لیے خطرہ ہے، وزیراعظم شہباز شریف کا دوٹوک مؤقف
اداکار عدنان صدیقی نے افسوس کا اظہار کرتے ہوئے کہا کہ زندگی میں کچھ لوگ خاموشی سے گہرا اثر چھوڑ جاتے ہیں اور عائشہ خان ایسی ہی شخصیت تھیں جو کئی ڈراموں میں ان کی آن اسکرین ماں بنیں۔ اداکار خالد انعم نے بھی افسوس کا اظہار کرتے ہوئے کہا کہ لیجنڈری اداکارہ عائشہ خان اس دنیا سے رخصت ہو گئیں۔ انہوں نے مرحومہ کی مغفرت اور اہل خانہ کے لیے صبر کی دعا کی۔
اداکار احسن خان، شگفتہ اعجاز، جویریہ سعود اور یاسر حسین سمیت دیگر فنکاروں نے عائشہ خان کے انتقال پر دلی دکھ کا اظہار کیا اور مرحومہ کے لیے دعائے مغفرت کرتے ہوئے کہا کہ اللہ تعالیٰ انہیں جنت الفردوس میں اعلیٰ مقام عطا فرمائے۔ یاسر حسین نے اس موقع پر کہا کہ افسوس اس بات کا ہے کہ اداکارہ کی وفات کو کئی دن گزر چکے تھے مگر سب بے خبر رہے۔