اسلام آباد، لاہور، پشاور سمیت پنجاب، خیبرپختونخوا اور گلگت بلتستان کے مختلف علاقوں میں زلزلے کے جھٹکے محسوس کیے گئے، جس کی شدت ریکٹر اسکیل پر 5.9 ریکارڈ کی گئی۔ زلزلے کی گہرائی 94 کلو میٹر جبکہ مرکز تاجکستان اور افغانستان کی سرحدی پٹی میں تھا۔
کراچی میں کل سے ہیٹ ویو کی پیش گوئی، درجہ حرارت 40 ڈگری تک پہنچنے کا امکان
زلزلے کے باعث عوام میں شدید خوف و ہراس پھیل گیا، لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔ اب تک کسی قسم کے جانی یا مالی نقصان کی اطلاع موصول نہیں ہوئی۔
زلزلے کے جھٹکے اسلام آباد، راولپنڈی، لاہور، فیصل آباد، گجرات اور دیگر قریبی علاقوں میں محسوس کیے گئے۔ خیبرپختونخوا کے پشاور، سوات، چترال، اپر دیر، نوشہرہ، مالاکنڈ، مردان، مانسہرہ، تورغر، چارسدہ، بونیر، شانگلہ، ہنگو اور گرد و نواح کے علاقے بھی زلزلے سے متاثر ہوئے۔
گلگت بلتستان کے کئی علاقوں میں بھی زلزلے کے جھٹکے محسوس کیے گئے، تاہم کسی قسم کے نقصان کی اطلاع موصول نہیں ہوئی۔
ترجمان پی ڈی ایم اے کے مطابق ابتدائی رپورٹس موصول ہو چکی ہیں اور پنجاب بھر میں ضلعی انتظامیہ عمارتوں کی جانچ میں مصروف ہے۔ ڈی جی پی ڈی ایم اے کے مطابق آفٹر شاکس سے نمٹنے کے لیے تمام مشینری اور عملہ الرٹ ہے، جبکہ کنٹرول روم اور ڈسٹرکٹ ایمرجنسی آپریشن سینٹرز فعال کر دیے گئے ہیں۔
ترجمان کا مزید کہنا ہے کہ زلزلے سے کسی بھی نقصان کی اطلاع پی ڈی ایم اے ہیلپ لائن 1129 پر دی جا سکتی ہے۔