کراچی (اسٹاف رپورٹر) ایڈیشنل آئی جی کراچی جاوید عالم اوڈھو کی ہدایت پر پولیس نے گزشتہ ہفتے شہر بھر میں انسداد جرائم کے خلاف کامیاب کارروائیاں کرتے ہوئے 615 سے زائد ملزمان کو گرفتار کیا۔ پولیس کے مطابق ایسٹ، ویسٹ اور ساوتھ زونز میں کی گئی کارروائیوں کے دوران ڈاکوؤں سے 9 پولیس مقابلے ہوئے، جن میں فائرنگ کے تبادلے کے نتیجے میں 2 ڈکیت ہلاک جبکہ 9 زخمی ڈاکوؤں سمیت 12 ملزمان گرفتار کیے گئے۔ گرفتار ملزمان سے 9 مختلف اقسام کا غیر قانونی اسلحہ اور 6 موٹرسائیکلیں برآمد ہوئیں۔
ترکیہ میں 6.1 شدت کا زلزلہ، 10 سے زائد عمارتیں زمین بوس
پولیس کا کہنا ہے کہ منشیات کے خلاف جاری مہم کے دوران مختلف علاقوں سے لاکھوں روپے مالیت کی 38 کلو 803 گرام چرس، آئس/کرسٹل اور ہیروئن برآمد کی گئی۔ گرفتار ملزمان سے شہریوں سے لوٹ مار اور دیگر جرائم میں استعمال شدہ 94 سے زائد مختلف اقسام کا غیر قانونی اسلحہ بمعہ ایمونیشن بھی برآمد کیا گیا۔
مزید برآں، چھینی و چوری شدہ 41 موٹرسائیکلیں اور 4 بڑی گاڑیاں بھی پولیس نے مختلف کارروائیوں میں برآمد کیں۔ کراچی پولیس کے مطابق جرائم کے خاتمے، امن و امان کی بحالی اور عوام کے تحفظ کے لیے یہ اقدامات آئندہ بھی جاری رہیں گے۔