واشنگٹن: چیف آف آرمی اسٹاف فیلڈ مارشل سید عاصم منیر نے کہا ہے کہ پاکستان نے محفوظ اور پرامن دنیا کے قیام کے لیے بھاری جانی و مالی قربانیاں دی ہیں۔ پاک فوج کے شعبہ تعلقاتِ عامہ (آئی ایس پی آر) کے مطابق آرمی چیف نے اپنے امریکا کے سرکاری دورے کے دوران واشنگٹن ڈی سی میں سینئر اسکالرز، تجزیہ کاروں، پالیسی ماہرین اور بین الاقوامی میڈیا نمائندوں سے ملاقات کی اور پاکستان کے اصولی مؤقف اور اسٹریٹجک ویژن پر تفصیلی تبادلہ خیال کیا۔
فیلڈ مارشل عاصم منیر نے اپنی گفتگو میں کہا کہ پاکستان عالمی امن و استحکام اور قانون پر مبنی بین الاقوامی نظام کے فروغ کے لیے پرعزم ہے۔ انہوں نے معرکہ حق اور آپریشن بنیان مرصوص کا ذکر کرتے ہوئے دہشت گردی کے حوالے سے پاکستان کے مؤقف کو اجاگر کیا اور بعض علاقائی عناصر کی جانب سے دہشت گردی کو ہائبرڈ وارفیئر کے طور پر استعمال کرنے پر روشنی ڈالی۔
آرمی چیف نے زور دیا کہ پاکستان دہشت گردی کے خلاف عالمی جنگ میں ہمیشہ صفِ اول میں رہا اور اس جنگ میں بے پناہ جانی و مالی قربانیاں دی ہیں۔ انہوں نے پاکستان کے آئی ٹی، زراعت، کان کنی و معدنیات کے شعبوں میں موجود صلاحیتوں کا ذکر کرتے ہوئے عالمی شراکت داروں کو دعوت دی کہ وہ ان شعبوں میں سرمایہ کاری اور تعاون کریں تاکہ مشترکہ خوشحالی کی راہیں کھولی جا سکیں۔
فیلڈ مارشل نے عالمی و علاقائی تنازعات پر پاکستان کے متوازن مؤقف، مذاکرات اور سفارت کاری کی اہمیت اور بین الاقوامی قوانین کی پاسداری پر زور دیا۔ ان کا کہنا تھا کہ پاکستان ہمیشہ سے خطے میں کشیدگی کم کرنے اور باہمی سلامتی کا فریم ورک قائم کرنے کی کوششوں میں پیش پیش رہا ہے۔
ملاقات کے دوران پاکستان-امریکا تعلقات پر بھی تبادلہ خیال کیا گیا، جس میں انسداد دہشت گردی، علاقائی سلامتی اور اقتصادی ترقی میں اشتراکِ عمل کا ذکر ہوا۔ آرمی چیف نے کہا کہ دوطرفہ تعلقات باہمی احترام، اسٹریٹجک مفادات اور اقتصادی انحصار کی بنیاد پر ایک جامع اور پائیدار تعلق میں ڈھالے جا سکتے ہیں۔
شرکا نے آرمی چیف کے مؤقف کی تعریف کرتے ہوئے اس ملاقات کو دوطرفہ اسٹریٹجک مکالمے کے فروغ کے لیے مثبت اقدام قرار دیا۔ اس موقع پر یہ پیغام دیا گیا کہ پاکستان اپنی اصولی و شفاف سفارت کاری اور فعال و متوازن مؤقف سے پرامن بقائے باہمی کے فروغ کے لیے پرعزم ہے۔