کراچی کی تاجر برادری نے نئی ایئر لائن لانے کا اعلان کردیا، ایئر کراچی کے نام سے نئی ایئر لائن جلد متعارف کروائی جائے گی۔
معروف کاروباری شخصیت حنیف گوہر کا کہنا ہے کہ نئی ایئرلائن کے نام ایئر کراچی کو سیکیورٹی ایکسچینج کمیشن آف پاکستان نے رجسٹرڈ کرلیا ہے جبکہ ایئرلائن کےلائسنس کے لیے وفاقی حکومت کو درخواست دے دی گئی ہے۔
لاہور میں فضائی آلودگی میں کمی، عالمی فہرست میں دوسرے نمبر پر رہا
انہوں نے بتایا کہ سدرن کمانڈر ایئر وائس مارشل عمران کو ایئر کراچی کا چیف آپریٹنگ آفیسر (سی او) مقرر کیا گیا ہے، پہلے مرحلے میں ایئر لائن کے لیے 3 طیارے لیز پر حاصل کیے جائیں گے۔
انہوں نے بتایا کہ ایئر کراچی میں عقیل کریم ڈھیڈی، عارف حبیب، ایس ایم تنویر، بشیر جان محمد، خالد تواب، زبیر طفیل اور حمزہ تابانی شراکت دار ہیں۔
انہوں نے مزید بتایا کہ ائیر کراچی میں ہر شئیر ہولڈر کا حصہ 5 کروڑ روپے ہے،ایئر کراچی کا لائسنس چند دنوں میں حاصل ہونے کے قوی امکانات ہیں۔
واضح رہے کہ اس سے قبل سیالکوٹ کی بزنس کمیونٹی بھی ایئر سیال کے نام سے ایئرلائن متعارف کراچکی ہے جس کا قومی اور بین الاقوامی آپریشن کامیابی سے جاری ہے۔
ابتدائی طور پر ایئرلائن کا فضائی آپریشن صرف پاکستان تک محدود تھا تاہم 29 مارچ 2023 سے دبئی اور مسقط کے لیے پروازوں کا آغاز کردیا گیاتھا۔
سابق وزیر اعظم عمران خان نے دسمبر 2020 میں سیالکوٹ میں ایئر سیال کا افتتاح کیا تھا، اس موقع پر ایئر سیال کے وائس چیئرمین فضل جیلانی نے کو بتایا تھا کہ اگرچہ 180 مسافروں کی گنجائش کے حامل ایئربس اے 320-200 ایس 16 سال پرانے ہیں لیکن ان کی حالت کافی اچھی ہے اور انہیں نئی نشستوں سے آراستہ کیا گیا ہے۔
یاد رہے کہ نجی ملکیت والی ایئر لائن کو 2017 میں ایوی ایشن ڈویژن کے ذریعے اپنے آپریشن چلانے کی اجازت مل گئی تھی۔