مہارت نیوز: اسٹیٹ بینک آف پاکستان نے نئی مانیٹری پالیسی کا اعلان کرتے ہوئے بنیادی شرح سود میں 200 بیسس پوائنٹس کی کمی کرکے اسے 17.5 فیصد مقرر کر دیا ہے۔
پاکستان کیلئے 7 ارب ڈالرکے آئی ایم ایف پروگرام کی راہ ہموار، بورڈ اجلاس 25 ستمبر کو طلب
مرکزی بینک کے جاری کردہ بیان میں کہا گیا ہے کہ مانیٹری پالیسی کمیٹی نے مہنگائی پر اثر انداز ہونے والے مختلف عوامل کو مدنظر رکھتے ہوئے شرح سود میں کمی کا فیصلہ کیا۔ بیان میں مزید کہا گیا کہ حالیہ مہینوں میں عمومی اور بنیادی مہنگائی میں تیزی سے کمی ہوئی ہے، جس کی اہم وجہ توانائی کی قیمتوں میں متوقع اضافے میں تاخیر اور تیل و غذائی اشیا کی عالمی قیمتوں میں سازگار تبدیلیاں ہیں۔
بیان میں مزید بتایا گیا کہ عالمی سطح پر تیل کی قیمتیں کم ہوئی ہیں، اگرچہ وہ تغیر پذیر ہیں، اور زرمبادلہ کے ذخائر 9.5 ارب ڈالر تک ہیں، باوجود اس کے کہ سرکاری زرمبادلہ کی آمد میں کمی اور مسلسل قرض کی ادائیگی ہو رہی ہے۔
مانیٹری پالیسی کے مطابق مہنگائی کی توقعات اور کاروباری اعتماد میں بہتری آئی ہے، جبکہ صارفین کی توقعات میں کچھ حد تک خرابی دیکھی گئی ہے۔ مزید یہ کہ ایف بی آر کی ٹیکس وصولیاں جولائی اور اگست کے دوران ہدف سے کم رہیں۔
اسٹیٹ بینک نے توقع ظاہر کی کہ موجودہ پالیسی اقدامات سے مہنگائی کو 5 سے 7 فیصد کے درمیانی مدت کے ہدف تک لانے میں مدد ملے گی، جس سے معاشی استحکام ممکن ہو سکے گا۔ سیمنٹ اور پیٹرولیم مصنوعات کی فروخت میں اضافے کا ذکر بھی کیا گیا، جبکہ زرعی شعبے کو کمزور قرار دیا گیا ہے۔
پالیسی میں پیش گوئی کی گئی کہ مالی سال 2025 کے دوران اوسط مہنگائی 11.5 تا 13.5 فیصد کے درمیان رہنے کا امکان ہے، بشرطیکہ مالیاتی اہداف اور بیرونی رقوم بروقت حاصل ہوں۔
شرح سود میں کمی کے حوالے سے اقتصادی ماہرین اور کاروباری برادری کی توقعات مختلف تھیں۔ مالیاتی ماہرین نے 150 بیسس پوائنٹس کمی کی پیش گوئی کی تھی، جبکہ کاروباری طبقہ 500 بیسس پوائنٹس کی کمی کا مطالبہ کر رہا تھا۔ اسٹیٹ بینک نے افراط زر کو کنٹرول میں رکھنے کے لیے 200 بیسس پوائنٹس کی کمی کو کافی سمجھا۔
گزشتہ مالی سال میں شرح سود کو 22 فیصد کی بلند ترین سطح پر رکھا گیا تھا، جس میں حالیہ مہینوں میں دو مرتبہ کمی کی گئی، مجموعی طور پر 2.5 فیصد کی کمی ریکارڈ کی گئی ہے۔