کراچی کے علاقے گلشن اقبال میں نیپا چورنگی کے قریب نجی ڈیپارٹمنٹل اسٹور کے باہر کھلے مین ہول میں گر کر جاں بحق ہونے والے تین سالہ ابراہیم کی سی سی ٹی وی فوٹیج منظرِ عام پر آگئی ہے۔ فوٹیج میں واضح طور پر دیکھا جاسکتا ہے کہ اسٹور کی دو سیڑھیاں اترنے کے بعد چند قدم کے فاصلے پر مین ہول کھلا ہوا تھا، جہاں سے گزرتے ہوئے ننھا ابراہیم اچانک گر گیا۔
گلشن اقبال میں کھلا مین ہول 3 سالہ بچے کی جان لے گیا، دل دہلا دینے والی فوٹیج سامنے آگئی
فوٹیج کے مطابق حادثے کے وقت مین ہول کے اطراف نہ کوئی حفاظتی رکاوٹ موجود تھی، نہ ہی کوئی تنبیہی علامت۔ بچے کے گرنے کے فوراً بعد اس کی والدہ بھاگتی ہوئی پہنچی اور مدد کے لیے دہائیاں دینے لگیں، جبکہ موقع پر موجود لوگ نالے کے گرد جمع ہوکر بچے کی تلاش میں مصروف ہوگئے۔
یہ افسوسناک واقعہ اتوار کی شب پیش آیا تھا۔ بچے کی والدہ کی روتی ہوئی دلخراش ویڈیو سوشل میڈیا پر تیزی سے وائرل ہوئی، جس نے شہریوں میں غم و غصے کی لہر دوڑا دی۔
اہلِ خانہ اور علاقہ مکینوں نے رات بھر اپنی مدد آپ کے تحت مشینری منگوا کر تلاش کا عمل جاری رکھا، لیکن کوئی کامیابی نہ ہوئی۔ پیر کی صبح، تقریباً 14 گھنٹے بعد، علاقے کے ایک نوجوان نے ابراہیم کی لاش جائے حادثہ سے تقریباً ایک کلومیٹر دور نالے سے برآمد کرلی۔
واقعے نے ایک بار پھر شہری انتظامیہ کی غفلت، کھلے مین ہولز اور عوامی حفاظت کے ناقص انتظامات پر سنگین سوالات کھڑے کر دیے ہیں۔