نوشین شاہ: قرآن کا ترجمہ سنتی ہوں تاکہ سمجھ سکوں اللہ ہم سے کیا کہتا ہے

اداکارہ نوشین شاہ نے کہا ہے کہ وہ باقاعدگی سے قرآن کا ترجمہ سنتی ہیں تاکہ بہتر طور پر سمجھ سکیں کہ اللہ تعالیٰ اپنے بندوں سے کیا فرما رہا ہے۔ انہوں نے یہ بات حال ہی میں فریحہ الطاف کے پوڈکاسٹ میں گفتگو کے دوران بتائی، جہاں انہوں نے اپنے ایک خواب اور اس کے بعد زندگی میں آنے والی تبدیلیوں پر کھل کر اظہارِ خیال کیا۔

پی ایس ایل: پشاور زلمی اور لاہور قلندرز کے فرنچائز حقوق مزید 10 سال کے لیے تجدید

نوشین شاہ کے مطابق کئی سال قبل انہوں نے ایک ایسا خواب دیکھا جس میں وہ خود، ان کے بھائی اور والدہ موجود تھے۔ چہل قدمی کے دوران انہیں ایک آواز سنائی دی جس میں کہا گیا کہ ’’اگر تم نے اپنے سر سے دوپٹہ اتارا تو فرشتے تمہارا ساتھ چھوڑ دیں گے۔‘‘ اس خواب کے اثر سے وہ فوراً جاگ گئیں، خوفزدہ ہوئیں اور پاس رکھا دوپٹہ اٹھا کر سر ڈھانپ لیا۔

اداکارہ نے بتایا کہ اس واقعے کے بعد وہ ہر ممکن کوشش کرتی رہیں کہ دوپٹہ سر سے نہ اُترے، اگرچہ شوٹنگ کے دوران کام کی ضرورت کے تحت کبھی کبھار وہ ایسا نہ کر پاتیں۔ وقت کے ساتھ انہیں محسوس ہوا کہ وہ دو مختلف زندگیاں گزار رہی ہیں—ایک جہاں سر پر دوپٹہ ہوتا ہے اور دوسری جہاں نہیں۔ اس کشمکش کے بعد انہوں نے اللہ سے معافی مانگی اور اپنی پرانی معمول کی زندگی کی طرف لوٹ گئیں۔

نوشین شاہ نے کہا کہ اسی کے بعد سے انہوں نے قرآن کا ترجمہ سننا شروع کیا تاکہ جان سکیں کہ اللہ تعالیٰ قرآن میں اپنے بندوں سے کیا مطالبہ کرتا ہے۔ انہوں نے اعتراف کیا کہ وہ باعمل مسلمان نہیں ہیں اور اسی وجہ سے اکثر اللہ سے معافی طلب کرتی رہتی ہیں۔

اداکارہ نے یہ بھی بتایا کہ وہ دعا کرتی تھیں کہ اگر اللہ ان سے محبت کرتا ہے تو انہیں نماز کی پابندی کی توفیق دے۔ ان کے مطابق اللہ نے ان کی دعا قبول کی اور اب وہ باقاعدگی سے نماز ادا کرتی ہیں اور اس عبادت میں انہیں سکون اور خوشی ملتی ہے۔