پاکستان سپر لیگ (پی ایس ایل) کی دو بڑی اور تجارتی اعتبار سے سب سے کامیاب فرنچائزز، لاہور قلندرز اور پشاور زلمی نے اپنے فرنچائز حقوق مزید 10 سال کے لیے حاصل کر لیے ہیں۔
آسٹریلوی سینیٹ میں برقعہ پہن کر احتجاج کرنے والی انتہاپسند سینیٹر ایک ہفتے کے لیے معطل
پاکستان کرکٹ بورڈ (پی سی بی) کے مطابق یہ معاہدے پی ایس ایل کے آئندہ 11ویں ایڈیشن سے قبل اس وقت کیے گئے جب لیگ کو 8 ٹیموں تک توسیع دینے کی تیاری کی جا رہی ہے۔ دونوں فرنچائزز کی نئی ویلیو کا تعین عالمی آڈٹ فرم ارنسٹ اینڈ ینگ نے کیا، جسے پی سی بی نے ایک شفاف اور جامع عمل قرار دیا ہے۔
گزشتہ چار سیزنز میں سے تین بار کی چیمپیئن اور پی ایس ایل کی سب سے قیمتی فرنچائز لاہور قلندرز نے سب سے پہلے اپنے حقوق کی تجدید کی۔ ٹیم کی قیادت قومی ون ڈے کپتان شاہین شاہ آفریدی کر رہے ہیں۔ پی سی بی چیئرمین محسن نقوی نے اس موقع پر خوشی کا اظہار کرتے ہوئے کہا کہ موجودہ مالکان عاطف رانا اور ثمین رانا نے لاہور قلندرز کو ایک بڑا عالمی برانڈ بنانے میں مرکزی کردار ادا کیا ہے۔
اسی طرح سابق چیمپیئن ٹیم پشاور زلمی نے بھی پیر کے روز مزید 10 سال کے لیے اپنے حقوق برقرار رکھے۔ پی سی بی کے مطابق جاوید آفریدی کی قیادت میں زلمی نہ صرف پی ایس ایل کی مضبوط ترین فین بیس میں سے ایک بن چکی ہے بلکہ گزشتہ سیزن میں سب سے زیادہ دیکھی جانے والی ٹیم بھی رہی۔
محسن نقوی نے جاوید آفریدی کے وژن، پیشہ ورانہ انداز اور جذبے کو سراہتے ہوئے کہا کہ ان کی قیادت نے زلمی کو پاکستان کی سب سے متحرک اور قابلِ تحسین اسپورٹس فرنچائزز میں شامل کرنے میں اہم کردار ادا کیا۔ انہوں نے کہا کہ حقوق کی تجدید کا فیصلہ پی ایس ایل کے مستقبل پر مضبوط اعتماد کا اظہار ہے۔