اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف کامیاب کریک ڈاؤن کرتے ہوئے 8 مختلف کارروائیوں میں 7 ملزمان کو گرفتار کر لیا۔ کارروائیوں کے دوران مجموعی طور پر 198.711 کلوگرام منشیات برآمد کی گئی، جن کی مالیت 1 کروڑ 63 لاکھ روپے سے زائد بتائی گئی ہے۔
پاکستان رینجرز اور پولیس کا مشترکہ آپریشن: ناظم آباد سے منشیات فروش گرفتار
اسلام آباد کے علاقے آبپارہ میں واقع کوریئر آفس سے قطر بھیجے جانے والے پارسل میں کتابوں میں جذب کی گئی 2.670 کلوگرام منشیات پکڑی گئی، جبکہ چکلالہ گیریژن راولپنڈی کے میل آفس سے برطانیہ بھیجے جانے والے پارسل سے 34 گرام ویڈ برآمد ہوئی۔
پشاور رنگ روڈ پر ایک شاپنگ مال کے قریب گاڑی سے 6 کلو چرس برآمد ہوئی اور 3 افراد کو گرفتار کیا گیا۔ کراچی کے علاقے سُرجانی ٹاؤن میں ایک رکشے سے 132 کلوگرام چرس، جبکہ فیصل آباد میں موٹرسائیکل سوار سے 6 کلو چرس، 2.4 کلو افیون، 2.546 کلو آئس اور 0.231 کلو ہیروئن برآمد کی گئی۔ کمال پور انٹرچینج فیصل آباد کے قریب ایک گاڑی سے 24 کلو چرس اور طورخم زیرو لائن بارڈر کے قریب ایک ہوٹل کے نزدیک سے 1.5 کلو آئس برآمد ہوئی۔
بلوچستان کے ضلع پنجگور کے علاقے بونستان میں اسمگلنگ کے لیے چھپائی گئی 24 کلو چرس بھی برآمد کی گئی۔
گرفتار تمام ملزمان کے خلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
