لاہور وفاقی وزیر داخلہ و نارکوٹکس کنٹرول محسن نقوی نے ملک بھر میں تعلیمی اداروں میں منشیات کی فروخت کے خلاف جاری کریک ڈاؤن پر ڈی جی اے این ایف میجر جنرل عبدالمعید اور ان کی ٹیم کی کارکردگی کو سراہا۔
وزیر اعلیٰ سندھ سید مراد علی شاہ نے قومی انسداد پولیو مہم کا افتتاح کردیا
وفاقی وزیر نے کہا کہ تعلیمی اداروں میں منشیات، خاص طور پر آئس کی فروخت کرنے والے عناصر کے خلاف سخت کارروائی جاری رکھی جائے گی۔ انہوں نے منشیات کی سمگلنگ کی روک تھام کے لئے ایئر پورٹس پر چیکنگ مزید سخت کرنے کی ہدایت بھی دی۔
محسن نقوی نے سرحدی علاقوں میں ڈرونز کے ذریعے منشیات کا کاروبار کرنے والے عناصر کے خلاف بلا امتیاز ایکشن لینے کی ضرورت پر زور دیا اور کہا کہ منشیات کے بڑے ڈیلرز کو ہر صورت قانون کی گرفت میں لایا جائے گا۔
وفاقی وزیر داخلہ نے سعودی عرب سے پاکستانی خاندان کی رہائی اور وطن واپسی کے لیے ڈی جی اے این ایف میجر جنرل عبدالمعید اور ان کی ٹیم کو شاباش دی اور کہا کہ اے این ایف کی محدود وسائل کے باوجود کارکردگی قابل تعریف ہے۔
محسن نقوی کی زیر صدارت ایک خصوصی اجلاس بھی ہوا جس میں منشیات کی خرید و فروخت روکنے کے لیے اہم فیصلے کیے گئے۔ اجلاس میں ڈی جی اے این ایف میجر جنرل عبدالمعید، ریجنل ڈائریکٹر اے این ایف بریگیڈئر سکندر حیات، ڈائریکٹر انفورسمنٹ بریگیڈئر عمران اور ڈائریکٹر انٹیلیجنس کرنل کامران نے بھی شرکت کی۔