مہارت نیوز: نواب شاہ ریلوے اسٹیشن کے قریب ریلوے کراسنگ پر بجری سے لدے ایک ڈمپر ٹرک کے پٹری پر پھنس جانے سے لاہور جانے والی شالیمار ایکسپریس ٹرین کو بڑے حادثے سے بچا لیا گیا۔ اس واقعے میں تمام مسافر محفوظ رہے۔
مہارت نیوز کے مطابق، پھاٹک پر موجود ملازم نے لال جھنڈی دکھائی جس کے بعد ٹرین ڈرائیور عبدالغفار نے خطرے کو بھانپتے ہوئے ایمرجنسی بریک لگا کر ٹرین کی رفتار کم کر دی۔ اگر ٹرک کے ساتھ تصادم ہوتا تو ٹرین پٹری سے نیچے اتر سکتی تھی، جس سے بڑے پیمانے پر جانی نقصان کا خدشہ تھا۔
ٹین ڈرائیور نے بتایا کہ ٹرین 180 کلومیٹر فی گھنٹہ کی رفتار سے چل رہی تھی جب انہوں نے دیکھا کہ ٹرک پٹریوں پر پھنس گیا ہے اور گیٹ مین لال جھنڈی لہرا رہا ہے۔ فوری طور پر ایمرجنسی بریک لگا کر ٹرین کی رفتار نمایاں طور پر کم کی گئی، جس سے ایک بڑے حادثے سے بچا جا سکا۔
ریلوے اسسٹنٹ انجینئر مقصود لاریک نے بتایا کہ ٹرین کے پھاٹک کے قریب پہنچنے سے قبل ہی گیٹ مین نے پھاٹک بند کرنا شروع کر دیا تھا، لیکن اس سے پہلے کہ وہ اسے مکمل طور پر بند کرتے، ٹرک ڈرائیور نے جلدی میں ٹرک کو پٹریوں پر چڑھا دیا۔
واقعے کے بعد ٹرینوں کی آمدورفت بحال کرنے کے لیے میونسپل انتظامیہ سے بھاری مشینری ادھار لی گئی کیونکہ ریلوے انتظامیہ کے پاس ایسی مشینری موجود نہیں تھی۔ ٹرک ڈرائیور موقع سے فرار ہو گیا، جبکہ ریسکیو ٹیمیں اور ریلوے حکام نے موقع پر پہنچ کر مسافروں کو امداد فراہم کی اور انہیں کھانے اور پینے کی اشیاء فراہم کی۔