مہارت نیوز: وفاقی وزیر خزانہ محمد اورنگزیب نے اعلان کیا ہے کہ پاکستان اور آئی ایم ایف کے درمیان 7 ارب ڈالر کے قرض پروگرام کے حوالے سے تمام معاملات خوش اسلوبی سے طے پا گئے ہیں، اور اس ماہ آئی ایم ایف کے بورڈ اجلاس میں ان معاملات کو حتمی شکل دے دی جائے گی۔
اسٹیٹ بینک نے مانیٹری پالیسی کا اعلان کردیا، شرح سود میں 2 فیصد کمی
یہ بیان آئی ایم ایف کی جانب سے 25 ستمبر کو ایگزیکٹو بورڈ کے اجلاس کے شیڈول کے بعد دیا گیا، جس میں قرض پروگرام پر بات چیت کی جائے گی۔ محمد اورنگزیب کے مطابق، آئی ایم ایف کے ساتھ تمام مسائل حل ہو چکے ہیں اور ملک کی معیشت استحکام کے بعد ترقی کی راہ پر گامزن ہے۔
وزیر خزانہ نے مزید کہا کہ مہنگائی میں مسلسل کمی سے عوام کو ریلیف ملنا شروع ہو چکا ہے، اور پالیسی ریٹ میں کمی سے ملک میں سرمایہ کاری اور کاروباری سرگرمیاں بڑھیں گی، جس سے روزگار کے مواقع پیدا ہوں گے۔
آئی ایم ایف کے ترجمان نے بھی تصدیق کی کہ پاکستان نے ترقیاتی شراکت داروں سے ضروری مالی یقین دہانیاں حاصل کر لی ہیں، اور 25 ستمبر کے اجلاس میں قرض پروگرام کی منظوری کا جائزہ لیا جائے گا۔