ایڈیشنل آئی جی کراچی جاوید عالم اوڈھو کی ہدایات کی روشنی میں پولیس نے شہر بھر میں جرائم پیشہ عناصر کے خلاف مؤثر کارروائیاں کیں۔ گزشتہ ہفتے کے دوران مختلف اضلاع میں ڈاکوؤں سے 13 پولیس مقابلے ہوئے، جن میں فائرنگ کے تبادلے کے نتیجے میں ایک ڈاکو ہلاک، جبکہ 16 زخمی ڈاکوؤں سمیت 26 ملزمان گرفتار کیے گئے۔ ان کے قبضے سے 20 مختلف اقسام کا غیر قانونی اسلحہ، ایک کار اور 10 موٹرسائیکلیں برآمد کی گئیں۔
اے این ایف کا ملک بھر میں منشیات اسمگلنگ کے خلاف کریک ڈاؤن، 8 کارروائیاں، 7 گرفتاریاں
کراچی پولیس نے ایسٹ، ویسٹ اور ساؤتھ زونز میں کارروائیاں کرتے ہوئے مجموعی طور پر 1054 سے زائد ملزمان کو گرفتار کیا۔ انسدادِ منشیات مہم کے تحت لاکھوں روپے مالیت کی 37.575 کلوگرام چرس، آئس (کرسٹل) اور ہیروئن مختلف علاقوں سے برآمد کی گئی۔
جرائم میں ملوث گرفتار ملزمان سے شہریوں سے لوٹ مار اور وارداتوں میں استعمال ہونے والا 120 سے زائد غیر قانونی اسلحہ بمعہ ایمونیشن بھی برآمد کیا گیا۔ اس کے علاوہ چوری و چھینی گئی 35 موٹرسائیکلیں اور 7 بڑی گاڑیاں بھی برآمد کی گئیں۔
کراچی پولیس نے واضح کیا ہے کہ جرائم کے خاتمے، امن و امان کی بحالی اور شہریوں کے تحفظ کے لیے کارروائیاں تسلسل سے جاری رہیں گی۔