لاہور: عالمی بینک نے پاکستان کے صوبہ پنجاب میں فضائی آلودگی کے خاتمے کے لیے 30 کروڑ ڈالر کے قرض کی منظوری دے دی ہے۔ یہ رقم پنجاب کلین ایئر پروگرام کے تحت فراہم کی جائے گی، جس کا مقصد ہوا کے معیار میں بہتری لانا اور عوامی صحت کو محفوظ بنانا ہے۔
عالمی بینک کے مطابق، اس پروگرام سے پنجاب حکومت کے اسموگ مٹیگیشن ایکشن پلان کو تقویت ملے گی اور فضائی آلودگی کو کم کرنے کے لیے جامع اقدامات کیے جائیں گے۔
ورلڈ بینک کے کنٹری ڈائریکٹر کا کہنا ہے کہ پنجاب کلین ایئر پروگرام اسموگ میں کمی کے منصوبوں میں معاون ثابت ہوگا اور لاکھوں شہریوں کی صحت و بہبود میں بہتری کا باعث بنے گا۔ انہوں نے مزید کہا کہ صاف ہوا کی دستیابی سے سانس اور دل کی بیماریوں میں نمایاں کمی آئے گی۔
عالمی بینک کا کہنا ہے کہ یہ منصوبہ اس کے نئے کنٹری پارٹنرشپ فریم ورک کے مطابق ہے، جس کا مقصد اگلے 10 برسوں میں فضا میں پی ایم 2.5 کی سطح میں 35 فیصد تک کمی لانا ہے۔